أي بيت فيه اطفال لازم يكون شهد نوبات غضب منهم. النوبات بتكون في احدي الصور دي:
بكاء متواصل.
رفض للتفاهم او الاستجابه.
صوت عالي في الكلام (لو الطفل بيعرف بيتكلم).
ممكن يصاحبها حركات انفعاليه من الطفل زي(مرمغه فالارض او دبدبه).
ممكن يصاحبها عنف من الطفل زي انه يكسر او يرمي حاجات.
السبب الرئيسي لنوبات الغضب هو ان الطفل رافض لشئ معين مطلوب او رافض الرفض من الابوين لشئ هو بيطلبه وبالتالي بيستخدم وسيلة الضغط دي على الابوين علشان يوصل للي هو عايزه.
حالات الغضب او التمرد بتبدا من سن صغيره يعني خلال السنه الاولي من حياه الطفل عن طريق تعبيره بالبكاء المستمر لطلبه حاجه معينه.
الاسره عليها العامل الاساسي في زياده النوبات دي (من حيث العدد والشده) او تقليلها وذلك من خلال كيفيه تعاملهم مع هذه النوبات.
التعامل الاساسي مع نوبات الغضب دي هو سيبيه يعيط…
ايوه سيبيه يعيط، وده معناه لما يبكي طلبا لشئ مرفوض او اعتراضا علي شئ مطلوب منه نسيبه يعيط.
“الكلام دي بيكون على البكاء الطلبات او الرفض وليس بكاء الالم”.
س: طيب هيحصل ايه لو استجبنا للبكاء علشان يسكت؟
ج: هتتكرر النوبات ويزيد عددها وحدتها ومدتها.
س: هل ينفع نشتت الطفل لحاجه تانيه غير الي بيعيط عليها؟
ج: نعم، ممكن. لكن برده لازم نعمل حسابنا ان الهدف مش اننا نسكت الطفل عن العييط لان “سيبيه يعيط” فعلا هيخليه يسكت.
س: طيب ما انا ياما جربت اسيبه يعيط وكان بيزيد في العياط؟
ج: لان هو عارف ان العييط هيجيب نتيجه فالاخر من خلال تجارب سابقه.
س: بس لما نسيبه يعيط ده مش بيكون قسوه عليه؟
ج: طبعا لا، ده احنا بنعمله ان العياط مش هينفع فيبطله.
س: انا بخاف يحصله حاجه من كتر العياط؟
ج: العياط مفيش منه خوف علي الطفل، انما خوفنا الزائد على الطفل منه ممكن يسبب مشكله للطفل خاصة مع تغير اسلوب التربيه فالبيت.
تعليمات هامه للتعامل مع هذه النوبات:
١- لازم لازم تحافظي على هدوء اعصابك معاه طول الوقت.
٢- ممنوع منعا باتا ترجعي في كلامك او تغيريه مع الطفل مهما عيط.
٣-تركزي ان الهدف ليس اسكات الطفل وانما الحفاظ علي نظام التربيه.
٤- تعمدي انك تعبري عن حبك للطفل اثناء بكائه وان هذه الافعال بتخليكي زعلانه منه علي الرغم من حبك ليه.
٥- لا تسخري من بكاوه ابدا.
٦- لا تستقبلي اللوم من الطفل، بل صرحي له انه هو الي عمل كده في نفسه
٧- حافظي على قيادتك للموقف ولا تخسريه
٨- الصبر مفتاح التربيه
Add a Comment